2Cor 4 | BEF | STEP | Hu'mau ai keke'i luse'namu foya'a yamofihi lu leto'ehinamo ya'ma to komopatigu keta mehina'mu kosele'i kasele'i mehone.

2 Corinthians 4

Lugufa'a ya'ma somo kele'a ya suhi huto ni'ibe

1 Hu'mau ai keke'i luse'namu foya'a yamofihi lu leto'ehinamo ya'ma to komopatigu keta mehina'mu kosele'i kasele'i mehone. 2 Ya nohutoti foipana amuya'a hiti huto hu lalibe luto suguna huto sibi hapa'a lilata nasana lemegesa hu emiloto mone fagamofihi gupisalo minoto Hu'mamofihi ka'a li sibina hulata ya'ma ya suhi menohune. Lali Hu'mamofihi bulo ai'a ka'a lu aku toto ma'naka luto lu huto huto lu noleputogo bona'i asaga'magi lali hapati keheligo fu luto ni'ibe. 3 To ka lamana'a lu yege nohota sapuya'a lutita ya'ma enali yabalugu limilata nehana enalitogago noluna ya hulata notine. 4 Enali ya'ma ana metogati gihiti bo moneuba gi'a Satau, ai komopa'ani fi hekini lago Kilisitotoga keheli meemise neminabe. To ai komopa'ani fi hekini lago enali ka lamana'amofihi fana meha'auba komopa'anigu limilenogo Kilisito Hu'mamofihi babeyafalo nominana bomofihi fana meha'a bu go fe lite bu menegabe. 5 Lali mono ka nokehelito laliti'mu lu lepiluta'a mehune. Yesu Kilisito ai lali'i Sipi Boti to lali Yesu kumu yabe luto lenali koko panatini lolo huto minoto minalune luto lu lepilata nohune. 6 Hu'mau ai koyapa'i metepuhi ni'inagu fi besa lobo luto ligo go'i lu besa lo'ehina. To ai'asigo ya'ma lulago komopatigu ai'a kamofihi fana meha'auba mino kikipa hago Kilisitohi gobisalo Hu'mamofihi silikeha fayaha'a huto hu lamana nohigo bu golata nohune.

7 To lali ai fana meha'a komopatigu li'ohuta bona'magita fa'mene bona'i lugufa lapa mebi'ehina bona'i nohune. Ana'ina mone hetofa hatofanamofihi mina'a ti'ehina'a sa megise bati mehina kapogu malalina suhi huto fana meha'a ya'ma komopatigu limi'ehina yabe. Henabe? Ai kagamofihi amuya'a lalitoga meni'igo ai Hu'mamofitoga ni'ina yamofihi hapa'a huto hilube luto yabe. 8 To laliya keke'i luse'namofihi gupisalo nohutogo yanauba lele'mo tili tele hilina'a meni'ibe. To legekesa loe kehelito negi no'ohuta yamofihi kehelutogo sibi mehu'ehibe. 9 Fatehati lolo nehanamagi babu lite kalana'i nemeletago Hu'mau afotifu menohe'mi letana yabe. Kalana'i mele letete ya nehanogo lagabu'i gilago sibigopa filito fenene mehune. 10 Ana suhi huto Yesu minoto lito hu'ehinamofihi komopa'a ana huto lugufaga huto hilibe luto lugufagati Yesuhi he nefiligo mino'ehina babeyafa ya'ma lito humofa'na hulata nohune. 11 To lali lubu hiti nohutogo kana'mu kana'mu bona'magi enali Yesu kumu lite lali ete neheti neheti hite lele'mo sibina sabana hite fililatanagu lele'mo melelata nehana yamofihi Yesu minoba minoba amuya'amofihi ya'ma lali fililuta lugufaga huto hilibe luto ya suhi huto huto hu limilata nohibe. 12 Ya hulago lalitoga fililatanauba foya'a lilata nohibe, to lenalitoga ule'ale huto nominana nasanauba foya'a lilata nohibe.

13 Mono bukugu fayahi ka mone ma lite keye'ahanamo ni'ibe:Nani aitoga nemehi emilata nohuto'ni ka lulata nohube. Ya lite keye'ahago lali ana legegeto aitoga keheli amuya mololata nohutoti ka'a lulata nohune. 14 Ya nohutoti ma luto kehelilata nohune. Hu'mau Sipi Bo Yesuhi fili'ehinagati le'mo ho ti'ehina ai suhi huto lali hiti ana huto lele'mo ho tiloto lenali hiti Yesu ai nohinalo lele'mo malalube'mu hibe. 15 Lali asaga nasana ya'ma lenali kumu yabe luto lolo huto moloto hulata nohune. Hu'mau lehe'mose'namofihi nasana i tili huto binogo bona'i asaga'magi kehelilete Hu'mamofihi foke ka lite enegelo bi emite Hu'mamofihi fana meha'auba bu baga o baga ito minalibe.

Lali keheli ule'ale huse'nagu nominone

16 Lali ya hu'ehina'mu yabe luto kosele'i kasele'i mehone. Lugufati lagabu'i gilata nohinaya kana'amu kana'amu komopatigu lele'mo amuya hulata to kosaba'i asaga yupahi limilata nohibe. 17 Metoga kalana'i mele letalana nesi'a yamofihi su halina yanauba sekele mamu'amofihi laga hina'a su mehose minoba minoba hilina'a li huto hu limilibe. Ana sekele mamu'a limilina'a yanauba lali kumu kalana'i nemalana li'ohutana be ligilina'mu yabe. 18 To ya huto ni'igo lali ana'ina keta'a hiti li limilata nehana yanauba ni'igopa ana'ina suguna nasanauba huto hu limilibe luto ana kegi'a komopatigu bu goloto minolata nohune. Ya'mana metoga ni'ina lubutu bu golata nohuta nasana yauba fa'menena lolo hilina'mu yabe. Ya'ma lubutu bu menogotanauba amuya moloto mino foto'i moloto minoba minoba huto minalina'mu yabe.